وش رايكم بمشروع الضحايا من اليوم..دعوة للنقاش

[المتفائل]

السلام عليكم ورحمة الله وبركاته

اخواني..........

الصراحه في بالي اشتغل في الهرافى من الحين
والفكرة كالتالي؛

اشتري هرافى نعيم بعمر شهرين ونص الى ثلاث شهور بسعر 420 الى 440 كحد اقصى
طبعا باقي على عيد الاضحى خمس شهور وشوي

الرجاء من اخواني اصحاب الخبرة المشاركة بخبراتهم في هالشغلة وخصوصا مايلي

1. المتوقع لاسعار الضحايا في العيد المقبل مقارنة بما حصل العام الماضي من خسائر فادحه

2. التحصينات المطلوبه عند الشراء

3. احسن مكان للشراء مثلا سوق العزيزية بالرياض او حفر الباطن

4.الاعلاف المطلوبة

5.التصريف قبل العيد وبالجمله ام يوم العيد


الموضوع للفائده وتبادل الخبرات والسلام عليكم

[أبوأريام]

توجه سليم محفوف بالمخاطر ولكن توكل علي الله وتر المكسب عندالشراء وليس عند البيع

انا اشوف ان الحفر افضل لانه سوق كبير وتراء فيه ايرانيات انتبه منها لايغشونك

هذا الى عندي وحبيت اشارك به

دمت بالف خير

[المتفائل]

ابو اريام

الله يعطيك العافيه وبانتظار باقي الاخوان

[خالد المطردي]

بالنسبة لي بديت أجمع من الآن (( قد الحال طبعاً ))
واذا جابت مكسب في الاجازة أو رمضان قلنابها ودورنا غيرها

أهم شي أخوي المبارك ، الاستعانة بالله ، ثم الحرص على النظافة والطعام والمتابعة الصحية " لا تتهاون بالعناية الصحية ولا تهملها ولو كلفتك .. احرص عليها "

واحرص على الهرافى اللي صحتها زينة وراضعة حليب لين شبعت واعمارها فوق الثلاثة شهور

والله يبارك لك

ويرزقك من واسع فضله

[المتفائل]

اخوي خالد

الله يجزاك خير

[ولد نجد]

بسم الله الرحمن الرحيم
اخوي : المتفائل . الفكره ناجحه بأذن الله لكن يلزمك خطه مدروسه في التنفيذ .
اولا : السعر اللي ذكرته مرتفع الاسعار عاده تكون من 340 الى 380 وكل ما كثر العدد قل السعر وكثر المربح .
بالنسبه لاحسن سوق هو انك تجمعها من اي سوق قريب منك . لكن بالنسبه لسوق الحفر احيان يكون غالي . لا تتوقع انه تشغل سيارتك وتطق مشوار وبتشتري احسن الغنم . الشراء من الحفر يبيله واحد مسنتر هناك كل يوم جالس بالسوق يتصيد البيعات والاوقات . خذها نصيحه كثير ناس تعنت وطقت مشوار وفي الاخير ربح قليل وفي بعض الاحيان ما طلع حق اجار الدينا .انا اعرف واحد اتفق مع سوداني يجمع له بشرط يتحمل التعليف صاحب الطلب طوال مدة التجميع ولما انتهاء المشروع وحسب الرجال حساباته طلع المربح ما يسوى تعبه قالي مربحه 5000ريال وش يفيد هذا المبلغ وطوال مدة اربعه شهور تفكير ومعاناة ومخاطرة . نرجع نقول سوق الحفر يبي واحد ساكن فيه اذا ما اشترى اليوم يشتري بكرا وهكذا ما يشتري بعجله او يشتري بالراس والعشرة روس حتى يجمع وهذا كله يخذ وقت
انا اكلمك عن نفسي مرتين بحياتي رحت اجيب من الحفر وتوبه مره بخسارة كبيره محمل دينا .ومره حملة الجيب وجيت طايررر وفي الاخير خسارة حوالي 300 ريال . اذا تبي تجيب من الحفر جب مقاني واقنها لا تبيع كذا انت رابح حلال طيب .
ثانيا : العلف المطلوب : شعير +برسيم + مكعب +ذرة = خروف سمين .
ثالثا: اذا كان العدد من العشرينات تقدر تصرفها قطاعي . اذا كان العدد في الميات تصريف وبالجمله وربي ارزقني وارزق مني .
خامسا : النعيم يتحمل ومقاوم احيان ما يحتاج تحصينات غير الفيتامينات والسلفا . ويمشي الحال + مراح نظيف .
رابعا: الاسعار هذا في علم الغيب . لكن اذا ما فتح الاستيراد بتصير الاسعار مرتفعه .
وندعيلك بالتوفيق وكل مسلم .

[أبو فهد]

السلام عليكم انصحك بالتجميع من الاسواق القريبة منك والقرى المجاورة وتحين الفرص

[المتفائل]

ولد نجد

ابوفهد

الله يجزاكم خير

[سلطان الحربي]

اخوي حبيت افيدك بشي يعلمك الصح

تعرف رمضان و عيد الاضحية تكثر فيه طلب الذباح الجيده

ولا نقول انه هو الوحيد التي ناكل فيها لحم والسوق غالى

العام كانت بداية رمضان خصاره والعيد ايضا والسبب وحد الكل مسك لهذا الايام
ونزل الكم الهايل من الذبايح والكل يبي يبيع الذبايح ولو بمكسب بسيط لانه اذا ما باع في هذي الايام يصعب تصريفها بعد هذي الايام .
والتجاره ما هي محدده في يوم واحد الا هو نبيع فيه ورزقنا مكتوب في هذي الايام .
الارزاق بيد الله يوزعها على من يشئ فيجب ان تكون التجاره على كامل العام في نصف الشهر تشتري واواخره تبيع . تشتري طليان صغيره عدد كبير وتفرق فيه .
والله يوفقك

[الفلته]

السلام عليكم

بالنسبة للتسمين والربط للتعليف فترة 3 شهور بأقصى حد لذلك ستكون البداية الآن مناسبة لمناسبة دخول رمضان بعد شهرين من الآن فستكون الأسعار في قمتها والطلب سيكون بازدياد خاصة مع موسم الزواجات الآن والى ماقبل رمضان فسيكون الأسبوع الذي يسبق رمضان بمشيئة الله موسم ممتاز.
ومن بعد رمضان سيكون هنالك شوال وذو القعدة شهرين لعيد الأضحى.

لذلك فرصة أن تقسم البيع الى فترتين الفترة الأولى قبل دخول رمضان بأسبوع الى أول يوم في رمضان .
والفترة الثاتية قبل الأضحى بأسبوعين يبدأ البيع الى قبل العيد ب3 أيام حاول تصرف كل الكمية التي لديك ولاتنتظر الى يوم الوقفة مثلما حصل مع كثير ممن لم يبع الا في آخر يوم ولم يجد من يشتري.

[جبار]

السلام عليكم ورحمة الله :ياخوي مدري شقول غير أنها مغامره بالنسبه لي جربتها العام من حلالي جنيتهم لي رمضان ونزلتهم ولابعت حتى راس واحد ورجعتهم نصيحه أشتر طليان ماهي معلوفه زين سمن وبيع على طول اعتقد هذي افيد والله يوفقك وكل اخوانا آآآمين ...

[المتفائل]

سلطان الحربي

الفلته

جبار

الله يعطيكم العافيه على المشاركه

[rani311]

بسم الله الرحمن الرحيم
. اذا تبي تجيب من الحفر جب مقاني واقنها لا تبيع كذا انت رابح حلال طيب .
.

هلا بالنجداوي
يعني اروح للحفر حيث انني ابحث عن 100 فطيمة مقنوي تكوين راس مال وراصد 100 الف لها وللاعلاف للتخزين واعداد المكان بالمزرعة
رايك يهمني


ودمتم 0000بود