السلام عليكم ياجماعة الخير

[راعي الدوادمي]

الله يبارك لكم في المنتدى , ويبارك لكم حلالكم , ويرزقكم بالخيرات والبركة ويوقف الجميع بما يحبه ويرضاه .


كنت أتصفح محركات البحث وحصلت المنتدى , والصراحة أعجبني شغلكم في الموقع , عشان كذا اعتبرو الداعي محرك البحث قوقل :d


وبقول لكم بعض المعلومات عن راعي الدوادمي بخصوص نشاط المنتدى :

1) ما يعرف شيء عن الغنم , ومبتلي هالبهايم والشكوى لله .. خير ما سواه إنه يطقطق على خفيف , خاف يطب في حلال واجد ويأثم فيه .
2) يعرف يشتري ولا يعرف يبيع .
3) ما عنده معارف في مجال تربية الأغنام يعتمد عليهم , أكثر ربعه ما خذين المسألة على البركة , بدون علم أو تجارب . واللي عنده حلال واجد يخاف الحسد , ولا يتكلم عن شيء :)

4) وده يتحرك برأس مال معقول , ويكتشف مجال تربية الأغنام من حيث الجدوى الإقتصادية , على أساس عـــملي , وكلام يدخل الرأس . مهوب كلام هقاوي وإحتملات تضيع الجهد .

5) مجال التحرك عندي , من الرياض إلى الدوادمي , وأطراف القصيم , لان دوامي هناك , وأروح للحفر والطائف في مناسبات واجد .

6) غشيم متعافي :)

7) أدور معرفة ناس فيهم خير شرواكم , ورأس المال سعة الخاطر والمعرفة . يمكن أخدم المشغول والبعيد والمستعجل باللي أقدر عليه . عندي فضاوة وقت ولاودي أطيح في البيت .



عساكم بخير , وفي بركة من الله يسبغها على حلالاكم .

والسلام عليكم .

[راعي النعيميه]

وعليكم السلام ورحمت الله وبركاته
حياك الله اخوي راعي الدوادمي والنتدى منتداك
وعسى الله يوفقك ويرزقك كل خير انشاء الله
اخوك:راعي النعيميه

[تمام]

السلام عليكم
حياك الله وانت بس امر والادارة والشباب مايقصرون معك اقراء المواضيع اللي لها صله برغباتك واكتب اي استفسار والمشرفين والادارة والمشرف الطبي يفيدونك

[khaledmoba]

وعليكم السلآم ورحمة الله وبركاتة
وحياك الله أخوي راعي الدوادمي بين اخوانك , وأتمنى لك التوفيق والنجاح في مبتغاك وعسى الله ييسر أمرنا وأمرك .

[راعي الدوادمي]

أشكر حضوركم


راعي النعيمية :

المهلي ما يولي نشكر لك حسن تعاونك ... :d


تمام :
نشكر جهودك وزملائك ..في الإهتمام بهذا المنتدى المتخصص


خالد :

الله يجزاك والاخوان هنا , لا يسع المرء إلا التفاؤل والإيمان يتوفيق الله .. نسأل الله البركة في العيال والمال وأن يعطينا القبول في الدنيا والاخرة .

شكراً للجميع .

[ابو سيف]

ابشر بعزك ياراعي الدوادمي


انت من المناطق الرئيسيه في انتاج وتصدير الاغنام


وانشالله مانبخل عليك بش وياليت بعد تعطينا اسعار الاغنام عندكم ايذا انت تروح لسوق


والله لايهينك

[راعي الدوادمي]

ابشر بعزك ياراعي الدوادمي


انت من المناطق الرئيسيه في انتاج وتصدير الاغنام


وانشالله مانبخل عليك بش وياليت بعد تعطينا اسعار الاغنام عندكم ايذا انت تروح لسوق


والله لايهينك


مرحبا فيك يا بوسيف

سوق الدوادمي لك عليه , مهوب بالحيل ..
يعني لو أجلب 50 رأس , ذبايح مستعد أقلب السوق فوق تحت . ما يتحمل تداولات متوسطة ..
الأسعار التفريد رخيص مقارنة بالرياض , يجيك جلاب مع طرف أو أثنين يأخذها الشريطية , شخصياً ما أتربح فيهن تشتري الزاكي بأكثر من 550 وخمسين وبعد ملاجد وأخذ وهات بالكود تبيعه بمكسب 30 أو عشرين ما يخارج لأن الأعداد قليلة والتجميع بهذه الطريقة عديم الجدوى أشتري حسب المزاج ..
إلا للصغار والمقطوعات عن العلف حسب الفرص التي يمكن أن تقتنصها في كل الاسواق . وفيها وفيها لولا الوناسة وحب البيع والشراء ما أطالع السوق . يجي في سوق رفايع الجمش مجلوب زين ,, من الغنم النجد . للي فاضي ويبي مقنوي ولا ترده العشرة والعشرين إلى الخمسين .
ولا يكثر الجلب الزين خمس أو أربع في كل ربق . يعني حمولة دتسن غمارتين . ونفوس أهلها حرفة وكأنهم بتأخذ حلالهم غصب ..


الرياض .. ما يقعد فيه شي , يستوعب جميع أنواع وأشكال وصفات الغنم , المشترين كثار .
ولا فيه فايدة إلا للجلب من الخمسين وفوق . ويفرد على عشرين أو خمس طعش . والطيب ما يقعد .
المقنوي أفضل سوق النضيم . والبهم .
الذبايح الزاكية عليك بسوق العزيزية ..بدري :)
وأنت أبخص .

وإذا بتشتري عليك بسوق العزيزية العصير قبل المغرب .. تحصل راعين الدينات واصلين حدهم من الطفش , مصرفين نص البضاعة وطايح في حلقوهم النصف الثاني .. يمديك تفاوض بقوة . وتأخذ خصوصا ًفي البهم الصغار .
مع أني ما قد شريت ولكن بغيت أطب وأنا ما عندي حوش , محصل ثلاثين بهم نجد ,زينة جرومها مناسبة لأعمارها في 4 شهور تقل ما تزيد , وفيها ضعف حال بسيط , بغيت أهفها 330 ريال . ورعيها يبي خمسة زود , ورحت ثم لحقني عند السيارة في أخر السوق :) وقلت باحت النية وأنحشت .. ولو عندي وسيلة نقل جاهزة ولا ني مرتبط بشغل والله لأخذها . للدوادمي وابيع على طول . ( فيه خمات وتصانيف تجي الواحد مع المغرب ودك يتعوذ منها المسلم ) .

أمس بايع رخل نجدية كبر العجل .. جذعة 580 ريال . فاردها من جمله مدري ترد رأس مالها أو لا :)

وخروف عندي في الحوش .. يسام 670 أتحدى أثنين يشيلونة .. ضخم وفوق الحجم الكبير يعني فاخر جداً ..
عساه بالضيف اللي ياكله .. والله ما جاب رأس ماله .. وهذه من الخمات اللي ودك المسلم يتعوذ منها .

[الصقر]

اهلين اخوي راعى الدوادمي وان شاء الله تستفيد من الشباب وتفيد

[راعي الدوادمي]

اهلين اخوي راعى الدوادمي وان شاء الله تستفيد من الشباب وتفيد


مرحباً بك ..

وشكراً على حضورك ..

[لؤلؤة الاعماق]

السلام عليكم ورحمة الله وبركاته
اخوي في الله
راعي الدوادمي
http://www.samtah.net/vb/msaracss/tobic/09.gif
اخلص التحايا
اختك في الله
لؤلؤة الاعماق

[shuja]

ونفوس أهلها حرفة وكأنهم بتأخذ حلالهم غصب ..


ياراعي الدوادمي ترى سوق الرفايع يجيه الناس من كل مكان

[راعي الدوادمي]

السلام عليكم ورحمة الله وبركاته
اخوي في الله
راعي الدوادمي
http://www.samtah.net/vb/msaracss/tobic/09.gif
اخلص التحايا
اختك في الله
لؤلؤة الاعماق



عليكم السلام ورحمة الله وبركاته أختي في الله ..

أشكر توقفك في الموضوع

[راعي الدوادمي]

ونفوس أهلها حرفة وكأنهم بتأخذ حلالهم غصب ..


ياراعي الدوادمي ترى سوق الرفايع يجيه الناس من كل مكان



مرحباً :p


لأني ما أحوف إلا البضاعة الطيبة ..
ما تشوفني عند سقط السوق .. أو من عرض ما يجلب المربين
أحوف السوق كأني شرطي مباحث يدور مطلوبين :D