قصة غريبة حصلت معي عند شرائي بعض الاغنام بالرياض

[أبو ســلطان]

كعادتي غالبا اذهب مبكرا للسوق حتى للاطلاع فقط ومعرفة الاسعار وعندما اجد غنم طيبه وسليمة من الامراض والعيوب والقيمة متوفرة في الجيب فأني أشتري على طول :lo
لكن أمس حصلت لي قصة غريبة وحقيقة أنزعجت منها ولا زلت أفكر هل هذا صحيح أم هو كذب من الدلال ؟؟؟

بقولكم وشصار بالضبط وابي رأيكم هل أنا مخطيء أم على حق ؟؟؟

لما وصلت للسوق حوالي الساعة 7.00 ص لفت نظري شاه طيبة بالحيل بالحيل من ناحية الجرم والسمن والمنظر ككل وكذلك السن ، وحسب خبرتي في السوق هذه الايام سعرها لا يقل عن 700 ريال الى 750 ريال وربما اكثر نظرا لجمالها مشاء الله عليها ..
كانت مربوطه في مربط احد الدلالين وكان راعيها واقف عندها ويبدو عليه انه قليل خبره في السوق إضافة إلى أنه كان كاشخ وكأنه رايح لعرس ماهو سوق أغنام :lo المهم سألت عن السوم كم ؟ قال 300 ريال:we انا ذهلت قلت أكيد الشاه فيها بلا قمت فتشت وقلبت وما خليت شيء فيها ولا وجدت بها اي عيب سألته هل فيها عيب أو مرض أو شيء ؟ قال لا الشاه سليمه وطيبه والحاضر الناظر ما ابي امدحها لك !! قلت في نفسي ماتحتاج مدح هذه أميره السوق اليوم:lo المهم قلت حدها خلني اشتري قال أفرق السوم يمكن ابيعك !! فكرت شوي قلت يا ولد خل اخذ لفة في السوق وأرجع له أن كان فيها نصيب ما راح تروح لغيري :lo المهم رحت اتمشى في السوق وغبت عنه حوالي ربع ساعة ورجعت له مرة ثانية سألته كم وصل السوم وكانت المفاجأة الثانية قال لازال 300 ريال :d قلت في نفسي لا مو معقول اكيد فيها مشكلة وعيب كبير والا كيف هوامير السوق يتركون هالجميلة !!! أعدت الكرة مرة ثانية وقلبت الشاه فوق تحت وفكيتها من رباطها قلت يمكن عمياء ولكن اتضح ان نظرها سليم وما فيه شيء!!!
المهم قلت له اسمع يالطيب قال سم قلت انا رجال شراي وانت ما جيت للسوق الا تبي تبيع راحت بـ350 ريال بعتني والا لا ؟؟؟؟ قال زود شوي قلت لا ما عندي زود راحت بـ350 والدلال عليك ؟؟ قال الله يربحك !!!! طبعا في هذه الاثناء ما كان الدلال موجود عندنا ولا شفته يحرج عليها نهائياً منذ البدايه .....!!!
قمت ناديت الحمالي وقلت شيلها في السيارة وأعطيت الرجال حسابه ولما ركبت سيارتي جاني الدلال قال وين حقي ؟ قلت حقك عند البائع شوف البائع خذ حقك منه قال وين راح قلت دور عليه مدري وين راح المهم راح من عندي الدلال وبعد شوي رجع لي وقال عطني حقي قلت يا اخي انا مشتري كدر ( اي مع حق الدلال ) ودار بيننا جدال وتجمعوا الناس قلت يا جماعة انا مشتري كدر حق الدلال على البائع والا على المشتري ؟ قالوا لا على البائع قلت اوكي مع السلامة المهم حركت من مكاني ووقفت في طرف السوق اكلم احد الاشخاص ولحق بي الدلال ومعه واحد قال الدلال الشاه مسروقة وهذا صاحبها !!!
وقام الشخص الثاني يبي ينزل الشاه من السيارة بالقوة !!! قفلت معي وأرتفع ضغطي 1000 قمت نزلت ومسكت به قلت أقسم بالله أن مديت يدك لها مرة ثانية أكسرها لك :we المهم خاف وأبتعد قال هذه شاتي مسروقه وقام يحلف بالله قلت مسروقة والا مو مسروقة ماهو شغلي أنا أشتريت من سوق ولا أعرفك ولا أعرف البائع وركبت سيارتي ومشيت .. وهذه القصة ويا أخوان هل أنا مخطيء أم مصيب وهل مشتراي صحيح من الناحية الشرعية ما ابي يدخل جيبي ريال حرام .. والشاه الان موجودة في غنمي ولا فيها شيء وبصراحة بديت أشك في وضع البائع ...واسف على الاطالة ...

[سهران]

والله ياخوك لو اني مكانك سويت نفس اللي انت سويته

طيب افرض انهم متفقين؟ وقاعدين ينصبون على العالم

اما هل هي حرام ولا حلال ماني بشيخ هههههههه

ودامك بالسوق على طول زي ماتقول ... تشوٌف للنصاب

وان شفته امسكه ولا اوصيك فيه ... طلع ظغطك اللي وصل 1000 على راسه وجره للي قالك انه
راعي الشاة وخلهم يتفاهمون

والله يعينا على اللي مايخافون ربهم

[راعي الريشا]

المسأله فيها شكك ؟؟.
ماشكيت يمكن تكون مؤامره من الدلال و صاحب الشاه المزعوم
بالضغط عليك حتى تجيب البائع حتى يأخذ منه دلالته...
ولو افترضنا انها مسروقه فعلاً مستحيل يخلونك تروح
إلا بعد اخذ عنوانك على الأقل او تلفونك . او يقولون امش معنا لشيخ الحراج

[بوزامل]

يحول
التأليف واضح من الدلال ........ وينه راعي الشاه يوم وقف به الحرامي حول الساعه بالسوق ؟؟؟
ولا طلع اللا يوم شريت بهربع ساعه ؟؟؟؟
ولو هي لهم كان خذوا رقم سيارتك ... وارفعوا بك بلاغ للشرطه !!!
ولو هي لهم ... أرجع للسوق .. وخل من ادعى انها له . يوصفها لك بعد فراق لمدة اسبوع فقط
تلقاه نسى شكلها اول وتالي !! ولو هي فعلا ل يذكر أوصافها لو بعد شهر ...

[محمدالحربي]

أخ ي أبو سلطان


بارك الله لك في حلالك ورزقنا واياك من فضله

رأيي :

وقد أكون مخطئا :

أنك أخطأت فربما كانت فعلا مسروقة وصاحبها لا يريد يصعد المشكلة بسبب قرب السارق إليه

احتمال :

أو أنه لا يهمه ما سرق أي صاحب الشاة بقدر ما يهمه معرفة السارق وقد عرفه 00

ما يجب عليك : أن تذهب إلى الدلال وتستحلفه بالله وفي ذمته هل كلامه صحيح أم تدليس مع تحملك للدلالة وهي خمسة ريالات أو عشرة لا يهم وإن عرفت الحقيقة وتبين لك أن الشاة مسروقة علي صاحبها أن يختار :

اتمام البيع وتحكيم أهل الخبرة بالسعر المناسب وإذا رغبت دفعت الفرق أو تتركها ويعيد عليك ما خسرته عليها من تعليف لها وتحميل وتنزيل وقيمة اشتريت بها الشاة 00

أخي الحلال على اسمه حلال أذا دخله الحرام لو مهما بلغ من زين لا بركة فيه وحرصي على حلالك وبركة مالك جعلني أكتب ما كتبت

والسلام

أخوك

محمد الحربي

[راعي الحلال]

الراي عندي لو انك قطعت الشك باليقين ورحت لشيخ الدلالين وعرضت عليه الموضوع احسن

[أبو فهد]

السلام عليكم
في رايي ان الخطا الاول منك انت يا بو سلطان( مع الاعتذار لك) المفروض المفاوضة في السعر وتسليم المبلغ يكون عن طريق الدلال لان صاحب الحلال منزلها في مربط الدلال والمسؤول الاول والاخير هو الدلال حتى تتفادى اي مشاكل
وللاحتياط يجب على الواحد منا اذا شرى غنم من السوق انه ياخذ رقم سيارة البائع

[سلطان الحربي]

وانا اخوك
هل الدلال هو من دل راعي الشاه عليك
لما تجمعوا عليك الناس لما تهوشة مع الدلال الرجال ما كان معكم يتفرج
روح السوق و تنكر وابحث عن الرجال اللى قال ان الشاه ملكه واذا لقيته في السوق شوف ويش يسوي هل هو شريطي ؟

اذا الدلال دل عليك راعي الشاه يمكن يكونون طبخينها مع بعض ويبون يكلونها عليك
لانه عرف انك مشتريه برخيص . وفيها شك

اذا كان مع الناس اللي تجمعو عليكم توكيد
واذا كان من اهل السوق وشريطي مالهم امان و يدل على التوكي

هذي المصيبه تعلمك على انك لبد لما تشتري شي تسجله عند شيخ الدلالين اكيد انك بتعرف في كتاب يسجلون فيه كل بيعه عشان لو اتضح انها مسروقه يعرفون يجبون اللي باع الغنم والمشتري ما يسلم الشاه قبل ما يدفع رعيها السعر اللي شراه الشراي

ومن واقع الشريطيه انهم اي واحد يجي للسوق واول مراه يبخصون سلعته واي واحد بيجي بعدهم يشك في الموضوع هذا الزين وهذا سعره اكيد فيها شي خلنا منها ندور غيرها
لكن انت ما شاء الله عليك قلبتها وعرفت انها طيبه وشكيت في وضعها وقلت خلها شوي ورجعت وقلبتها مره ثانيه واتكدة انها طيبه وشريت والله يباركلك

[راعي الدوادمي]

تأكدت من الشاه , وترى السعر طبيعي , ويمكن تحسف راعيها على البيعة , أو كان الدلال ناوي يكسرها .

أتذكر دخلت جملة طليان حرية 6 رؤس , وكان المحرج ينادي والسوم 210 ريال هههه ولما قرب مصري يجس الطليان .
قال : ترى ما نضمن تكون مريضة أو فيها عله , تموت عندك أو ,.,أو ترى ما نتحمل مسؤولية لين طير الزبائن من البضاعة ..

صارت حكاية ..

المهم .إنك مادمت معطي فلوس في البضاعة . ويقولون مسروقة , فالحل هو أنك ترد البضاعة براس مالك . وهذا هو اللي يبونه , أنك تقول خلاص يالربع عطوني دارهمي وماصار إلا كل خير !!

[وبل]

شغلك سليم توكل على الله ..

[saaad]

الله المستعان

الراي من محمد الحربي زين

والموضوع فيه ريبة من البياع والدلال والمدعي

والله يوفقك ويدلك للحق قول امين

[شاهر]

وجهة نظري ان الدلال تحوم حوله الشكوك

واما الشاه عليك حلال انت شريت برضى البايع والدلال

ونقطة التحول كانت فلوس الدلال يعني ..................

وسلامتكم

[محمد الغامدي]

ياأخ سلطان وفقك الله أنا شوري لك ألا تعدي الموضوع وتطنش ، أرى أن تعطي الأمر الأهمية الكافية من باب إبراء الذمة ، والأخوان أشاروا عليك بعدد من الأفكار كلها طيبة ، فانظر ما يناسب
واقعك وشخصيتك وافعله ، أهم شيء تحرص على اتضاح الصورة عندك وإبراء ذمتك 00

وفقك الله

[بلدي]

طز بهم .. لا يهمونك عيال النصب و النهب والحرام ..

كذابين دجالين وإلا فيه شاة طيبة-على قولتك- بـ300ريال ..

الله يفضحهم .. وينصرك عليهم

[أبو ســلطان]

أشكركم أخواني على التفاعل مع الموضوع وأعتذر عن التأخير لظروف سفري ...

الحمد لله أسعدتني أرائكم الجميلة وحقيقة اليوم ذهبت الى السوق وسألت الناس الي في السوق عن الشخص الذي يدعي ان الشاه له وانها مسروقة وحسيت ما أحد يبي يقولي الحقيقة ومن يكون هذا الرجل خاصة الدلالين ولكن وجدت واحد سوداني في السوق وقالي أن هذا الشخص صاحب حوش في السوق ومتخصص في بيع الماعز فقط وحلف بالله ما سبق شافة يبيع أغنام وقالي أن سمعته سيئة بين الناس الذين تعاملوا معه ..
والله أعلم أذا السوداني صادق في كلامه أو لا ..؟
المهم أنا حكيت القصة لاحد الدلالين من كبار السن ويبدو عليه أنه رجل ملتزم وسمعتة طيبة في السوق وقال لي موقفك سليم أن شاء الله وحذرني من بعض الدلالين في السوق ومن ضمنهم الدلال الذي حدثت مع المشكلة ...
والله أعلم ...
بالنسبة للشاه موجودة في الحوش الان مع الغنم ومشاء الله عليها لم أرى فيها أي عيب .. والحمد لله أولا وأخرا ... وكل الشكر والتقدير للاخوة الذين عطروا هذه الصفحة بردودهم وأرائهم الطيبة .. وعساكم على القوة ... أخوكم أبو سلطان ....

[المهاجر]

معقول شاه طيبة وتسوى 700ريال يبيعها صاحبها 350نصف السعر،الموضوع غير سليم وعليك ابلاغ الدلالين المعروفين في السوق عن وضع هذه الشاه لابراء ذمتك.

[saaad]

الله يبارك لك وفيت وكفيت

اما اخي المهاجر كم منا يشتري بغالي ولا باع كسر قيمة حلاله من الشريطية والدلالين

والبياع ما همه وقت الحاجة

[محمد الغامدي]

أشكركم أخواني على التفاعل مع الموضوع وأعتذر عن التأخير لظروف سفري ...

الحمد لله أسعدتني أرائكم الجميلة وحقيقة اليوم ذهبت الى السوق وسألت الناس الي في السوق عن الشخص الذي يدعي ان الشاه له وانها مسروقة وحسيت ما أحد يبي يقولي الحقيقة ومن يكون هذا الرجل خاصة الدلالين ولكن وجدت واحد سوداني في السوق وقالي أن هذا الشخص صاحب حوش في السوق ومتخصص في بيع الماعز فقط وحلف بالله ما سبق شافة يبيع أغنام وقالي أن سمعته سيئة بين الناس الذين تعاملوا معه ..
والله أعلم أذا السوداني صادق في كلامه أو لا ..؟
المهم أنا حكيت القصة لاحد الدلالين من كبار السن ويبدو عليه أنه رجل ملتزم وسمعتة طيبة في السوق وقال لي موقفك سليم أن شاء الله وحذرني من بعض الدلالين في السوق ومن ضمنهم الدلال الذي حدثت مع المشكلة ...
والله أعلم ...
بالنسبة للشاه موجودة في الحوش الان مع الغنم ومشاء الله عليها لم أرى فيها أي عيب .. والحمد لله أولا وأخرا ... وكل الشكر والتقدير للاخوة الذين عطروا هذه الصفحة بردودهم وأرائهم الطيبة .. وعساكم على القوة ... أخوكم أبو سلطان ....

وفقك الله وبارك لك في حلالك ، أرى بعد هذا ألا تشغل نفسك فقد عملت مابوسعك ، وكلام أهل السوق لك فيه كفاية إن شاء الله 00

[سلطان الحربي]

بس وانا واخوك بعد اليوم اذا شريت اي غنم سجلها عن شيخ الدلالين عشان اذا جات مشكله تطلب اللي شريت منه
وللعلم
انهم يطلبون البطاقه او الرخصه
ويطلبون رقم الهاتف ورقم لوحت السياره

[خيال الغلبا]

اخوي ابو سلطان انت طلبت الرأي
فخذ رأيي

موقفك غير سليم :
اولا شاة قدرت ثمنها بـسبعمائة ريال تمحط بثمنها الى 350 اليس هذا من الغبن اترضاه لنفسك لوكنت محتاج للبيع في مثل موقف البائع

يااخي الله امرنا بالإنصاف .. وانت تعرف ان الدلالين اللذين ساموها قبلك ب300 نصابين

ثانيا : البائع ايضا في بيعه ريبه والا كيف يبيع سلعة تساوي 700 بـ350

ثالثا : الدلال لاشك في كذبه فهو كاذب والدليل انه اول الأمر مااعترض على البيعة وانما كان يطلب دلالته

[أبو ســلطان]

اخوي ابو سلطان انت طلبت الرأي
فخذ رأيي

موقفك غير سليم :
اولا شاة قدرت ثمنها بـسبعمائة ريال تمحط بثمنها الى 350 اليس هذا من الغبن اترضاه لنفسك لوكنت محتاج للبيع في مثل موقف البائع

يااخي الله امرنا بالإنصاف .. وانت تعرف ان الدلالين اللذين ساموها قبلك ب300 نصابين

ثانيا : البائع ايضا في بيعه ريبه والا كيف يبيع سلعة تساوي 700 بـ350

ثالثا : الدلال لاشك في كذبه فهو كاذب والدليل انه اول الأمر مااعترض على البيعة وانما كان يطلب دلالته


من قالك اني اعرف انهم نصابين ؟؟؟؟
لا تحط شيء في ذمتك واعد قراءة الموضوع بارك الله فيك ..
من ناحية السوم مالي علاقه في سومتهم انا فرقت السوم بـ50 ريال فقط وللتجربة... وفي نفسي لحظتها كنت اقول لا يمكن يبيعني بهذا السعر لاني اعرف تماما قيمة الشاه التي أمامي .. لو كانت نيتي باطلة والعياذ بالله كان فرقت السوم بـ10 أو 15 ريال ..
ثانيا طلبت منه يحدها ورفض في البداية ولما فرقت السوم باعني وش ذنبي انا في هالحالة ؟؟؟؟


خيال الغلبا سلملي على الغلبا كلهم خاصة الشاعر الفراج:lo

[هلالي]

انت تقول انها مربوطه في مربط دلال يمكن صاحب الشاه استغل الفرصه واخذ السعي لعدم وجود الدلال والكن انت تقول تسوى 700 ارجع للدلال وعطه سعي عشان تثبت انه معروضه عنده وتشهد عليه

[الحسيني]

انشالله انت ماعليك شى هذى مسؤالية الدلال

المفروض يسجل بينات البائع للاحتياط واذا كانت مسروقه يتحملها الدلال

وشكرااا

[ابو سعود1]

بالفعل فيها شك

والدليل سعرها حتى انت شاك في الموضوع

ولو اعطيت المحرج حقه مبلغ بسيط..... وشفت ردة فعله كان احسن

ولما وصلت لهذه المرحلة كان تقدمت لااقرب مركز حتى تعرف غاية المحرج .................


هذه من وجهة نظري

[المذكور]

اساله عن الوسم بعد فتره

[بي52]

السلام عليكم ورحمة الله
اخي ابوسلطان
=
الغريب بالموضوع
1_الدلال غير موجود يوم انك تتفاوض مع الرجال الكشخه
2-ماجاك الدلال الا بعد ما تمت البيعه وحملت غنمك
3_وش درا راعيها انها عند الدلال هذا وانك انت اللي شريتها
==========================
اخيرا
ان كان فيها سرق وما سرق
فالحرامي الأول
هو الدلال
=====
ما عليك من احد انت شاري بفلوسك
وان شا الله ما عليك شي
الله يبارك لك