ابي مشورتكم تنصحوني اشري ضحايا من الحين

[تركي9]

السلام عليكم
اسعد الله مسائكم بكل خير

متردد ياشباب بالشرى للضحايا وللبيع مع العلم الحوش جاهز وكل شيء
هل تنصحوني اشتري او انتظر لعل ينزل سعر العلف

وما السعر المعقول الي تنصحوني فيه للراس
سواء نجدي او نعيمي

بانتظار ردكم واتمنى الأفاده لي ولغيري

شاكر ومقدر,,

[ابو سعود]

انتظر شوي مهوب سعر العلف بينزل
سعر الغنم بينزل مع فتح الاستيراد
هذا بالنسبة للنعيمي
وبالنسبة للنجدي لا تنتظر اشتر

[أبو فهد]

السلام عليكم
الضحية قربت
انصحك تتردد على السوق لمدة اسبوع حتى تعرف الاسعار ثم تشتري نصف الكمية التى تنوي شراءها وقبل الاضحى باسبوعين تشتري الباقي وذلك تحسبا لكل الظروف

[تركي9]

شكرا لك اخواني الغالين ابو سعود و ابوفهد
ع المعلومات شوركم طيب
وبنزل السوق من فتره لفتره

[راعي @ الغنم]

شاكر للاخوان على ماقدمه من النصائح وجزاكم الله خير

[بلدي]

عندك مكان وش تنتظر

اشتر

الآن بلا شك الأسعار مع أقتراب العيد ترتفع ..

[راعي الدوادمي]

ما عاد باقي إلا شهر ونصف ..
وإذا أخذت نجدي يمكن يتغير عليك ولا يمدي يتعدل .

والنعيمي فرصة المكسب فيه غير مأمونة حالياً إلا لمن جهز قبل رمضان . لو شريت الزاكي و نفترض على 620 جملة , ووين تحصله؟ قد تشترى 670 ريال , وتطعمه شهرين بتكلفة 1.90 , قل ريالين .في اليوم . لمدة 45 يوم سيكون 710 ريال . وهامش الربح متأرجح بين 90 ريال و150 ريال .

النجدي إنسى إنك تأخذ طيب إلا فرصة ..
وحتى لو شريته قد يتغير عندك والفترة ليست كافية لكي يتعدل .

تستطيع الدخول في السوق يوم 8 و9 , وتقتنص فرص جيدة .
أو رتب للصيفية من الآن , لأن الولادات هذا الموسم بدأت من شهر رمضان ,وتستطيع الشراء على هونك ..

عندي 25 رأس فقط , وتكلف علي أكثر من ألف وميتين ريال شهرياً . وراتب العامل 200 ريال فقط , ومتوجس كثير .
طعامها لكل ثلاثة أيام كيس مكعب وثلاث ربطات برسيم . والبرسيم على 18 والمكعب بخمسين ريال .

معنوياتي مضروبة .. ولا أستطيع التفكير ما دمت برى السوق خايف ادخل .


هذا إذا كنت تتحرك برأس مال متوسط , والتعب تحصيل حاصل يعني رايح جاي على حوشك قليل وكثير , أشتر على مهلك ...
المكسب في الأضحى اللي تعب وحلب وصر وراعى وساهر حلاله .. مهوب لك ياصاح .. جاي بقرشين وتدور مكسب ؟!
لو تطير ما تحصل أكثر من 100 ريال في الرأس وقل 150 ريال . في مئة رأس مع خصم التكلفة ما تتعدى عشرة ألاف ريال . ويدك على قلبك خايف على فلوسك .

هذه هواجسي .. الشخصية وقد أكون مجانب للمنطق..

[البرنسxp]

اقول الحق روحك مع الرياجيل واشتر