ليش تكون كبيرة في السوق وصغيرة على السماط

[راعي الدوادمي]

بعض الذبايح تكون كبيرة , وكثيرة اللحم , وبعد طبخها , في المرق بدون تحمير , تشمر وتصغر , والبعض على العكس , تحتقرها وبعد ما تقدمها تجد وكأنها أنتفخت في المرقة .

وأيضاً للإستطراد في الموضوع : بعد اللحوم تصير سوداء مع الطبخ ..


هل يوجد تفسير ..حقيقي بعيد عن التخمينات والإحتمالات , ناس يتهمون المكعب , وإذا كان المكعب هو السبب , فما هو السبب الذي يضخم اللحم في القدر ويجعله أطرى والذ؟!
وناس يقولون من طريقة الطبخ وشعلة النار ,, وهذا كلام لا تؤكده ربات البيوت !
وناس يقولون : من الذبح ..
وناس يقولون : من عطش الذبيحة قبل الذبح ؟ّ
وناس يقولون : من النقل والتحميل على الشاحنات ؟!

السؤال مطروح للجميع !

[محمد بالعبد السويدي]

الجواب الأخير هو الصح Stress الضغط النفسي هو السبب في سواد اللحم و قساوته اخي العزيز هذا الكلام اللي اقوله لك كلام من كتاب انا قريته بنفسي طلبته على الانترنت من امريكا الأغنام تتعرض للضغط :

1 عند جز الصوف يجب عليك اعطائها ابرة مضاد حيوي مع فتامين ب6 وب12 وب العادي
2 عند النقل تتعرض لحمى النقل لمسافات بعيدة وعندما توصل تموت ثاني يوم فا على طول قبل لا يتحرك البيك ام عطهم مضاد حيوي مع ابرة حمى
3 عند المطاردة في الحظيرة ومحاولة الامساك او احتجازهم في زاويه ايضا تتعرض للضغط ولكن هذة لا تتطلب اي ابر ولكن في ماده يفرزها فجسمه مما يؤدي لسواد اللحم وايضا تكون ريحه في اللحم فا يجب مراعاة الذبح في أمريكا تعلق الذبيحه لفترة بعد الذبح حتى ترخي العضلة وهذا كلام صحيح انته لاحظ الشي الميت ايكون في تشنج في العضل تحركه ويرجع لمكانه مثل الأنسان الميت اعوذ بالله. وطريقت التعليق بعد السلخ من اليدين اي ان تقلب الذبيح وخلها معلقه فبراد لمدة تتراوع لساعات .
طبع هذ غير متبع في دول الخليج المهم يجب اختيار ذبايح صغار السن يعني ثلاث شهور ونصف ان كثر ولكن اخوانا في السعوديه وقطر ياكلون ذبايح كبيرة بالسن مما يؤدي لقساوة اللحم ويشترونها غالية على سبع ميه ليش ما ياخذ ثنتيين صغار على سبع ميه .
وبعديين في شي وهذا عن تجربة الوالدة حتى تروح الزنخه من اللحم ثلجه في الفريزر اللحم يوم يثلج اتروح الزنخه

اخوي ماعز السوق مهان اهانه خصوصا اللي بحظائر السوق بعد اللي يجاب من المزارع ويباع بالسيارات احسن من اللي جابته باخره وحمله ستين ادمي من مكان لمكان وخذله كم اسبوع او كم يوم لا باعوه وقفت السوق هذة اتكفي روح انت ياخوي واوقف بالسوق ساعه شوف رجلك كيف اتوجعك وتيبس عليك فما بالك اللي متعرض لها الضغوط واقف اسبوع لا اكل ولا عيشة طيبه كانه بمخيم لاجئيين

يا اخي الفاضل الأغنام اللي تربى بالمزرعه وتذبح في نفس المزرعه ازكى واطيب لأن ما يمديه كلها دقايق والسكين على ارقبته.

اسمع ها القصه انا بحياتي ما اكلت لحم صومالي وسامع كم مرة ايقولك اع لو الموت ما كلته لحمته سودا وقاسيه وفعلا هذا ما حصل مرة جربته برحلة مع شباب اخوياي اعوذ بالله اع اع اع اسود وريحته غريبه انا ما ادري كيف حد من الناس تاكله هذا والسبب من الرعي واذا ناوي تذبح من الرعي اذبح بو ثلاث اشهور وبس لكن اللي ماشي مسافات بعيده هذا معضل وقاسي.
احسن شي اللي رابي بحضيرة المزرعه ولااااااااااااااا اذا ربى فالبيت ازكى واطرا اسالني انا.
تحياتي لك

[محمد بالعبد السويدي]

اخوي اقرا موضوع التيبس الرمي في منتدى اللحوم نفس المنتدى يتكلم عن ترك الذبيحه لساعات بعد الذبح من الناحيه العلميه بس خلني اذكرك اتركها معلقه من اليدين مش من الرجليين هذا مثل ما قريته بالكتاب اللي قلت لك عنه

[بن عريفج]

شكر شكرا شكر شكرا

[محمد بالعبد السويدي]

حاضريين للطيبين لكن اللي سأل ما تفاعل مع الموضع وانا متعب حالي وقاعد اكتب له شكله مب مقتنع بكلامي تبيني احلف بحلف عادي ما عندي مشكله

[راعي الدوادمي]

هههههههههههه

أفا عليك يا بو العبد ..

قلنا نترك المجال لمداخلات اكثر ..
ولا عندي رد , ولا تأكيد لكلامك ..ولا نفي .
صحيح إن إرتفاع ضغط الحيوان , عامل أساسي لرداءة اللحم . ولكن يوجد عوامل مختلفة ..
من حيث التجربة .. أجد أن الذبائح التي أشتريها من المرب مباشرة لا تعطي نتائج سلبية .
والعكس يحصل من ذبائح السوق .



طيب إنتفاخ اللحم في القدر . وتقلصه .. ؟!

يوجد موضوع قريب يناقش مسألة الذبح ..

عموماً .. موسم الصيف قادم .. وبنشوف :)


بن عريفج :

أشكر مرورك .. :)

[محمد بالعبد السويدي]

انزين شو قلت لك انا ربى المزارع غير عن السوق وبعديين هذا عن تجربه وقراءة

[صعب المنال]

مشالله عليك يا بو جاسم كل ازيد اعجابي بخبرتك

[راعي الحلال]

والله انا اعتقد صوف الغنم له دور بالقصه فمثلا
تاخذ نعيمي مربرب وذا سلخطه وثر الدعو صوفه منفوش وواجد واللحم قليل
ولا تاخذ بربري ماله شعر تستحقره لكن الي شفته هوهو على طبيعنه لا فيه شعر ولا غير الدعوه لحم وشحم
============= ممكن

[بي52]

اخي الكريم
كثر اللحم وقللته يعتمد على الحجم والنوع فكما ذكر اخونا الكريم راعي الحلال
تلقاه منتفش من الصوف
والفصيله لها دور اساسي بالموضوع
فمثلاً النجدي تشريه من السوق صغير واذا ذبحته تستغرب من كبره
لأن عظمه جلال
وبالعكس النعيمي
صوفه ونفشه على غير سنع
--------------
اما سواد اللحم
فهو من الخبز
ماله دخل الضغط النفسي
(والخروف يدري وين هو رايح له)
اما بعد الطبخ
فهنا تجي (خبرتي) واحد مسوي طباخ فنان هههه
كثر الطبخ يجعل الذبيحه اصغر حجم وخاصه مكان الظهر
لأن اللحم سبحان الله تقول يذوب
واذا جاه طبخ زين و مؤقت توقيت صحيح تلقاه ما عندك ازين منه
والله اعلم

[محمد بالعبد السويدي]

اسمح لي اخوي بي 52 مب كل الغنم تاكل خبز بس كل الغنم تتعرض لضغوط في غنم ما تاكل غير الكراتين ولحمهن احسن من اللي ماكله شعير بعطيك طريقة اتشوف الضغط وش ليسوي انت جيب اغنمه وكل ثلاث ايام حطها بمكان وشوف وش يصير فيها هذا اذا عاشت سمني عاشت
وبعدين مسألة ان الذبيحة تصغر هذا لأن جسم الحيوان مثل الانسان نسبة الماي في عالية وبعد الطبخ يطلع كل الماي من الاحم وبالتالي تصغر

[راعي الدوادمي]

مرحبا محمد , صعب المنال , بي 52 ,

صدقوني فكرت كثير ما لقيت لها حل ...
يعني عندي في الحوش , وتربية شخصية , وصارت معي , ولا أعطيها خبز , أعتقد أنها تتعلق بطبيعة الذبيحة . أو كثافة اللحم .
أو ربما من الماء . الملح , كلش متوفر .. بس ما أعرف ليه تصير كذا .. يمكن مرض مخفي ما ندري عنه ؟!
بالرغم من إقتناعي بكلام أخوي محمد _ نظرياً _ ألا أنني لم أستوعبه عملياً !

[محمد بالعبد السويدي]

هههههههه يالدوادمي اذبح الصغير وشوف هذا لا يعرف ضغط ولا غيره ماله غير هالضرع يرضع منه وشوف لحمته انا ذبحت خروف عرب عمره سنه وقلت الا اشوف لحمته طلعت سودا على حمرا واخذت ساعة وشوي طبخ وحلوه بس لونها ما يشجع وذبحت بو ثلاث شهور ولحمته طلعت بيضا وطبخوه خمس واربيعين وذاب كانه تين لكن ماكمل الا وجبتين والا بوسنه للحين ما خلص لحمه مشاء الله فأذن عندنا العمر يلعب الدور الرئيسي في لون اللحم والحين اخصيت ثلاثه واحد بذبحه يوم يكبر ويكمل سنة وواحد بعد شهريين وبعطيك النتايج لازم انجرب ومع اني مش اول مرة اكل لحم بس لهذا الغرض دقت براسي بصراحة وعلى فكره لحم خراف السوق يجي احمر المهم ارجع واقول يا اخواني اللحم فيه ماي علشان جذيه شكله كبير ومن يطبخ ايقل حجمه هذا شي معروف حتى ايقولك لا جيت تطبخ خل الماي موازي اللحم يعني شوي اللحم يكون باين في القدر ليش؟ وبعدين لا رجعت اتشوف اتلاقيه متغطي من الماي وحتى امرار اتكب الماي لا زاد عن حاجته. هههههههههههه افا عليكم بس الطبخ فن بعد بس تعبت يالدوادمي من ها الموضوع خذله شهر لا تكتب شي دخيلك لين اتجيك علوم اللي خصيتهم وانت بكرامه

[راعي الدوادمي]

مرحباً شباب ..

اليوم مودي تويس صغير .. للمندي , وخجلان , والناس متجمعين _ عشاء عائلي _ , وطلع على الصحن فلة .. وكأني شكيت إن صاحب المنتدى غلطان ..

دخلت الحوش عقب المغرب , وشفت التيس داخل المعلف حق البرسيم .. وأنا ما أحب الحركات هاذي .. ولا أنتبه لنفسه إلا هو وسط الخيشة .. :d وهذا مصير كل تيس تسول له نفسه الدخول في معلف البرسيم !! :d

حتى صاحب المنتدى قال هذا مهوب سمين .. !! والحمد لله جنبه عرض الصحن , وعضيداته مربربة ..